Patay ang 25 ka mga indibidwal matapos nga nasunog ang isa ka school bus sa Thailand nga may sakay nga 44 ka kabataan kag mga manunudlo.
Lakip sa sakay sang bus ang naga-edad halin kindergarten tubtob sa 13 ukon 14-anyos nga mga estudyante.
Suno kay Transport Minister Suriya Juangroongruangkit, indi pa maathag ang numero sang mga napatay apang 25 ka tawo ang unaccounted matapos ang sunog.
Sa inisyal nga report, may 44 ka sakay, 38 ka estudyante kag anum ka manunudlo, samtang tatlo ka mga manunudlo kag 16 ka mga estudyante ang nakaguwa kag nakaluwas.
Nahibaluan nga nagsugod ang sunog matapos nga ang isa ka goma sang bus ang naglupok sa highway sa Bangkok mga alas 12:30 sang hapon (0530 GMT), rason nga ang bus nakabunggo sa isa ka barrier kag nagkalayo.
Ang mga rescue workers ang nagbutang sang mga screen agud amligan ang mga bombero kag mga imbestigador samtang nagakuha sang mga bangkay gikan sa nasunog nga bus.
Nagpalab-ot naman sang simpatiya si Prime Minister Paetongtarn Shinawatra sa pamilya sang mga biktima sa makahalanusbo nga trahedya.
