Paga-imbestigaran sang Commission on Elections (COMELEC) ang natabo nga pagbinaisay sa tunga ni San Joaquin, Iloilo Mayor Ninfa Garin kag Vice Mayor Marvigrace “Taba” Getuya.
Sa interview sang Bombo Radyo kay Atty. Renier Layson, Provincial Election Supervisor IV- COMELEC Province of Iloilo, iya ginpahayag nga gina-monitor na sang talatapan ang sitwasyon sang pulitik sa amo nga banwa.
Suno kay Layson, strikto nga ipatuman sang COMELEC ang pagsulondan antes nga ideklara ang isa ka lugar nga yara sa election related concern areas.
Ginpahayag man sini nga hulaton sang talatapan ang resulta sang mangin imbestigasyon sang kapulisan antes ibutang ang banwa sang San Joaquin sa watchlist kaangot man sa nagainit nga pulitika.
Nahibaluan nga ginkompronta ni Mayor Garin si Vice Mayor Getuya matapos nag-file sang certificate of candidacy ang mga kaupdanan sang bise-alkalde.
Matunog naman nga ginasuportahan ni Getuya si Atty. Joe Abad Lazaro nga amo ang magapapili sa pagka-alkalde kag makontra ni Iloilo 1st District Board Member Val Serag nga suportado naman sang pamilya Garin.
