Nag-abot na sa Pilipinas ang Filipina-American singer-songwriter nga si Olivia Rodrigo para sa iya nagahilapit nga “GUTS” concert.
Naghugpa ang eroplano nga ginasakyan sini sa Ninoy Aquino International Airport (NAIA) subong nga hapon kasunod sang Singapore leg sang iya world tour.
Kaupod sa byahe ni Olivia amo ang British actor nga si Louis Partridge.
Ini ang labing-una nga tion nga nakabisita ang amo nga pop star diri sa Pilipinas, kag gilayon sini nga gin-share sa isa ka social media post ang iya una nga gintilawan: ang popular Filipino dessert nga halo-halo.
“Halo-halo secured! So excited to be in the Philippines!,” pahayag sang Grammy-winning singer.
Matabo ang concert sa Oktubre 5, Sabado, sa Philippine Arena.
Nagsugod ang “Guts” world tour sang Pebrero 23 sa Acrisure Arena Desert sa California kag magatakop sa Marso 30, 2025 sa Lollapalooza sa Brazil.
Maragtason ini nga event sa Philippine concert scene nga may halos 800,000 ka mga tawo nga naghulat nga makakuha sang tickets sa iya concert. Base sa Live Nation, 745,000 fans ang yara sa waiting list sang nagsugod sila sa pagbaligya sang tickets.
Kilala si Olivia sa iya mega-hit songs kaangay sang “driver’s license”, “good 4 u”, “vampire”, “traitor”, kag “deja vu”.
Ang matipon sa sini nga konsyerto ang magakadto sa Fund 4 Good nga isa ka global initiative “committed to building an equitable just future for women and girls.”#
