Ginpaathag ni Raisa Treñas-Chu nga matuod nga ginpatawag sila sang pila ka matag-as nga lideres sa national agud istoryahan ang pulitika sa sa Iloilo City.
Sa interview sang Bombo Radyo kay Executive Assistant to the Mayor Raisa Treñas-Chu, ila pagasundon kon ano ang resulta sang nangin negosasyon, kon sa diin, amo ang pagtingob sang ila grupo sa grupo ni Iloilo Lone District Representative Julienne “Jam-Jam” Baronda.
Suno kay Treñas-Chu, tuyo man ini ni President Ferdinand “Bong-bong” Marcos, Jr. nga iduso ang “unity” agud mapadayon ang pagpauswag sa syudad.
Gintumod man sang natungdan nga isa lang man ang tinutuyo sang ila grupo kag ang sa piyak nga grupo, amo ang ipadayon ang magserbisyo.
Sa bahin naman sang pagpanginwala sang kampo nanday Baronda ila pag-updanay, ginsaysay sini nga ginasunod lamang nila ang mando sang yara sa ibabaw bangud nagapati sila nga “a good leader is a good follower “.
