Gin-athag sang opisyal sang Barangay Navais, Mandurriao, Iloilo City nga simple lang nga pagpab-ot sang selebrasyon ang tarpaulin nanday Iloilo City Lone District Rep. Juienne “Jam-Jam” Baronda kag sang utod sini nga si former Councilor Love Baronda.
Sa interview sang Bombo Radyo kay Punong Barangay Jim Christopher Capalihan sang nasambit nga lugar, iya ginpahayag nga isa ka simple nga pagpalab-ot sang selebrasyon sa kapiestahan ang tarpaulin nga nakit-an sa silod sang ila barangay covered gym.
Suno kay Capalihan, may coordinator nga naglisensya sa ila council agud butangan sang poster nanday Cong. Baronda kag nagpasugot man ini.
Para sa iya, wala man sang problema ang pagbutang sang tarpaulin sa ila barangay, kon sa diin, kahapon nga adlaw lang sang nanotisyaran sini ang tarpaulin.
Gin-athag man sini nga ginarespeto nila ang pagbutang sang poster kag wala sang lamod sang pamulitika ang amo nga sirkumstansya.
Nahibaluan nga una na nga nagpaguwa ang kampo ni Iloilo City Mayor Jerry Treñas sang pahayag nga maga-upod ang iya anak nga si Raisa Treñas-Chu kag si Baronda sa 2025 midterm elections.
