Indi direkta nga masabat ni Uswag Ilonggo Representative Jojo Ang kon siya ang nangin palaagyan agud nga makahimo sang negosasyon sa tunga sang Team Uswag ni Iloilo City Mayor Jerry Treñas kag Team Gugma ni Iloilo City Rep. Julienne “Jam-Jam” Baronda.
Sa interview sang Bombo Radyo kay Cong. Ang, iya ginpahayag nga wala siya sang labot sa nangin negosasyon sang matag-as nga lideres sa tunga nanday Baronda kag Treñas.
Suno kay Ang, personal niya nga desisyon nga pakamaayuhon ang bahin nanday Baronda kag Treñas bangud nagapati ini nga mas madasig nga naga-uswag ang syudad kon may paghigugma.
Gin-athag man sini nga wala nag-ayo ang grupo Treñas sang bulig sa iya agud nga maistorya si House Speaker Martin Romualdez agud manegosyar ang Team Gugma.
Ginlaragway man sang natungdan nga ang iya ginhimo daw kaangay sa isa ka classroom nga bilang isa ka presidente sang klase, kinahanglan nga yara sa maayo nga kahimtangan ang mga estudyante.
Nagalaum man si Ang nga mag-ugyon ang duha ka grupo sa tinutuyo nga pagserbisyo sa syudad nga wala sang lakot nga kompetisyon.
