Hugot nga gina-monitor sang Philippine Army ang mga lugar sa Western Visayas nga may previous record sang mga insidente nga naangot sa eleksyon.
Ini ang isa man ka tikang para sa filing sang certificate of candidacy (COC) sang mga political aspirant para sa 2025 midterm elections.
Sa interview sang Bombo Radyo kay Lieutenant Colonel J-jay Javines, Chief sang Division Public Affairs Office, 3rd Infantry Division – Philippine Army, iya ginpahayag nga padayon sa gihapon ang pag-monitor sa pila ka mga areas nga anay ginpaidalom sa red kag orange alert.
Suno kay Javines, in general, ginahatagan gid sa focus sang talatapan ang padayon nga military operation sa pila ka mga lugar nga may presensya sang mga rebelde.
Gin-athag man sini nga sa subong, wala pa sang may nahatag nga data kon ano nga lugar ang ipaidalom sa red kag orange alert status.
Nahibaluan nga sang nagligad nga eleksyon, lakip ang banwa sang Tapaz sa Capiz kag pila ka parte sang Antique ang yara sa mga areas nga hugot ginabantayan sang militar.
Wala naman sang may na-record ang Philippine Army nga pagpamahog sa pila ka mga lugar sa rehiyon sugod sang nag-umpisa ang filing sang COC.
