Patay ang isa ka triskad driver matapos nga gintiro sang duha ka mga indibidwal sa Barangay Balabag, Pavia, Iloilo.
Ang biktima amo si Wilfredo “Dudoy” Batican, residente sang nasambit nga lugar.
Sa interview sang Bombo Radyo kay Police Major Dadjie Delima, hepe sang Pavia Municipal Police Station, iya ginpahayag nga antes natabo ang krimen may yara sang nagluntad nga komprontasyon sa tunga sang biktima kag kasilingan sini.
Gilayon naman nga ginreklamo ang biktima sa ila nga barangay matapos ang komprontasyon.
Suno kay Delima, naga-inom-inom sang soft drinks ang biktima sang ginpalibotan ini sang duha ka mga suspek kag gulpiyada nga gintiro.
Nag-agum sang indi magnubo sa lima ka mga pilas ang biktima kon sa diin, gindala pa ini sa Western Visayas Sanitarium and General Hospital sa Sta. Barbara apang, gindeklara nga dead-on-aarival (DOA).
Ginpahayag man sini nga trisikad driver gid ang trabaho sang biktima, apang naga-sideline lang ini sang pagbaligya sang lanzones.
Gintumod man sang hepe nga naka-helmet ang mga suspek kag nakasakay sa motorsiklo rason nga madasig nga nakapalagyo ang mga ini.
Ginahulat naman subong ang resulta sang tests nga ginpatuman sang forensic team sang otoridad.
