Napasakaan na sang kaso nga rape with homicide ang suspek nga nagpatay sa isa ka babaye kag ginaalegar naglugos sa isa ka menor-de-edad sa Barangay Arante, Sara, Iloilo.
Ang suspek amo si Ricardo “Ricky” Teruel, 34-anyos, residente sang Villa Hermosa, Sara, Iloilo.
Ang biktima amo sanday Grace Asiwagan Fortaleza, 45-anyos, kag ang 17-anyos nga hinablos sini, lunsay residente sang nasambit nga lugar.
Sa interview sang Bombo Radyo kay Police Major Joegen Suegay, hepe sang Sara Police Station, iya ginpahayag nga nagaguwa sa resulta sang autopsy nga multiple traumatic injuries ang rason sang kamatayon sang 45-anyos nga iloy.
Suno kay Suegay, nagpositibo man sa sexual abuse ang iloy nga biktima nga ginbasehan man sa pagpasaka sang nasambit nga kaso.
Gintumod man sang hepe nga dos-por-dos ang gingamit sang suspek sa pagpanglampos sa biktima.
Nahibaluan nga nagakatulog sa balay ang mga biktima, kon sa diin ginapahayag nga ginsulod sang suspek ang hulot paagi sa bintana.
Sa amo nga tion, nakabugtaw si Grace kag ginlamposan sang suspek agud nga indi na makapangayo pa sang tabang.
Nag-agum sang pilas sa guya kag sa baba ang iloy, kon sa diin nayupok gid ang piyak nga bahin sang guya sini nga gintunaan man sang iya nga kamatayon.
