ILOILO CITY – Wala nangin upang sa isa ka manunudlo ang ginasuprir sini nga epilepsy agud mangin madinalag-on sa iya career.
Sa interview sang Bombo Radyo kay Eleazar Cordova Danila sang Calumpang Molo, Iloilo City, iya ginpahayag nga yara siya sa pre-school sang gin-diagnose nga may yara sang epilepsy.
Suno kay Danila, may mga kahigayunan nga gina-atake ini sang epilepsy sa ila eskwelahan.
May mga kahigayunan man suno sa natungdan nga indi ini maka-inom sang iya maintenance bangud man sa kakulang sang kwarta sang naga-eskwela pa ini.
Nagtapos si Danila sa kurso nga Secondary Education, major in English sa West Visayas State University (WVSU).
Sa subong, malipayon si Danila nga nagatudlo bilang high school kag college instructor sa St. Vincent Ferrer Seminary.
Ginpahayag sini nga bangud man sa giya sang Diyos kag sa suporta sang iya pamilya, nabuligan ini nga malampuwasan ang pagtilaw sa iya kabuhi.
Nangin recipient man ini sang 2022 Epilepsy Exemplar Award in the Philippines.
Sa subong, nagpadayon si Danila sang iya Master of Arts in Education, major in Language Teaching English, sa WVSU.
