Ginbasura sang Korte Suprema ang hingyo ni Atty. Harry Roque nga writ of amparo batuk sa Quad-Committee sang Kamara.
Ini ang may kaangtanan sa order of contempt kag detention sang Quad-Comm batok kay Roque bangud wala nakatambong sa pila ka mga hearing sang komitiba.
Sa interview sang Bombo Radyo kay Atty. Alfredo Arungayan III, Bombo Abogado, iya ginpahayag nga wala nagsumiter sang pila ka ginapangayo nga mga dokumento si Roque nga isa sa ginbasihan sang Korte Suprema nga ibasura ang writ of amparo sini.
Suno kay Arungayan kag santo sa Korte Suprema, indi nagakaigo nga remedyo ang amparo petition batok sa contempt and detention order sang Kongreso.
Ginpahayag man sini nga ang petisyon para sa writ of amparo gina-file agud amligan ang isa ka tawo batok sa ginaalegar nga pamahog sa iya mga kinamatarong sa kabuhi, kahilwayan, kag seguridad.
Ginklaro sang Korte nga limitado lamang ang sakop sang amparo sa extralegal killings kag forced disappearance, ukon pagpamahog nga wala sa kaso nga ginpasaka ni Roque.
Sa baylo, ginmanduan sang Korte ang Quad-Comm nga mag-file sang komento sa Petition for Prohibition sa sulod sang 10 ka adlaw halin sa pagbaton sang nasambit nga resolusyon sang Korte Suprema.
Nahibaluan nga gin-file sang bata ni Roque ang petisyon agud mapunggan nga arestuhon kag piliton nga magtambong ang iya amay sa hearings sang Quad-Comm.
