Maid-id nga ginabantayan sang Pavia Municipal Police Station ang lugar sang duha ka mga suspetsado nga nagluthang-patay sa trisikad driver sa Barangay Balabag, Pavia, Iloilo.
Ang biktima amo si Wilfredo “Dudoy” Batican, residente sang Barangay Balabag, Pavia, Iloilo.
Ang suspek amo si Alias Aljun, 35 years old, kasado, jobless, residente sang Brgy Jereos, Lapaz, Iloilo City. Siya ang nagserbi nga driver sang gun man nga sa subong, nagapabilin nga wala pa matumod ang identity.
Sa interview sang Bombo Radyo kay Police Major Dadjie Delima, hepe sang Pavia Municipal Police Station, iya ginpahayag nga lakip sa mga gina-imbestigaran nga anggulo amo ang kaangtanan sa iligal nga droga sang mga suspetsado, rason man nga nasal-an ang biktima nga police asset.
Suno kay Delima, natumod ang isa ka suspek sa bulig man sang closed circuit television (CCTV) sa Jereos, Lapaz.
Ini man ang nagtul-id sa ginaistaran sang mga suspek bangud didto sila nag-exit matapos nga ginhimo ang pagpaniro sa trisikad driver.
Ginbuyagyag man sini nga anay na may ginkaulamiran nga kaso sa grave threat ang nadakpan nga suspetsado.
Padayon naman nga gina-ayam sang otoridad ang gun man nga nagapabilin nga ‘at large’.
Kon balikan, naga-inom-inom sang soft drinks ang biktima sang ginpalibotan ini sang duha ka mga suspek kag gulpiyada nga gintiro.
Nag-agum sang indi magnubo sa lima ka mga pilas ang biktima kon sa diin, gindala pa ini sa Western Visayas Sanitarium and General Hospital sa Sta. Barbara apang, gindeklara nga dead-on-aarival (DOA).
