Ginklaro sang Commission on Elections (COMELEC) Iloilo Province nga indi makabig nga election related concern ang natabo nga pagbaisay nanday San Joaquin Mayor Ninfa Garin kag Vice Mayor Marvigrace “Taba” Getuya.
Sa interview sang Bombo Radyo kay Atty. Renier Layson, Provincial Election Supervisor IV- COMELEC Province of Iloilo, iya ginpahayag nga sa ila pagpatigayon sang imbestigasyon kaupod ang kapulisan, natumod nga away sa pamilya lamang ang natabo sa tunga sang Garin kag Getuya.
Suno kay Layson kag sa election officer nga nag-imbestigar sa insidente, isa ka isolated incident ang natabo nga indi makaapekto sa eleksyon sa amo nga banwa.
Nanindugan man ini nga ang insidente ang wala nakatuga sang pagpamahog sa seguridad sang pumuluyo kag sa eleksyon sa amo nga lugar.
Pananglitan naman nga may magreklamo sa nangin imbestigasyon sang COMELEC, bukas ang ila talatapan agud nga diskusyonan ang amo nga hitabo.
