Ginalauman nga magaabot sa Pilipinas subong nga bulan ukon sa temprano nga bahin sang Nobyembre, 2024 ang 30,000 metric tons sang tamudyos kag iban pa nga mga isda nga gin-import sang Pilipinas.
Kadam-an sang sini nga imports ang magahalin sa Vietnam kag China.
Sandig sa monitoring sang Department of Agriculture (DA), ang retail price sang galunggong nga gintawag anay nga “poor man’s fish” ang nagatupa na subong sa P240 kag P360 ang kada kilo.
Antes sini, sang isa ka bulan ang nagligad, yara pa lamang ang presyo sa P200 tubtub P300 per kilo.
Nagdepensa man si Bureau of Fisheries and Aquatic Resources (BFAR) spokesman Nasser Briguera sa desisyon sang National Fisheries and Aquatic Resources Management Council nga pasakaan ang volume sang imported fish sa 30,000 MT halin sa orihinal nga 25,000 MT.
Ginpahayag sini nga ginkonsiderar sang council ang mga halit nga ginbilin sang bagyo sa fisheries sector.
Suno kay Briguela, magasugod ang gobyerno sa pagpatuman sang closed fishing season sa Palawan sa Nobyembre 1 samtang ang fishing ban naman sa Zamboanga Peninsula ang magasugod sa Nobyembre 15.
Ang tatlo ka bulan nga fishing ban amo ang ginalantaw nga tion para nga maka-repopulate ang mga isda.
