Ginakabig sang Commission on Elections (COMELEC) Iloilo Province nga madinalag-on ang walo ka adlaw nga filing sang candidacy sang mga kandidato sa Iloilo.
Sa interview sang Bombo Radyo Atty. Renier Layson, Provincial Election Supervisor IV- COMELEC Province of Iloilo, iya ginpahayag nga apisar may mga magagmay nga problema nga na-encounter ang ila talatapan, “generally” makabig sa gihapon nga matalunsay ang COC filing para sa May 12, 2025 elections.
Suno kay Layson, tanan nga nabaton sang COMELEC nga certificate of candidacy sang mga kandidato ang wala sang “major” nga problema nga na-eksperyensya.
Ginlaragway man sang natungdan nga nangin “smooth sailing” ang dalagan sang pag-file sugod sa pinaka-una nga adlaw tubtob nagtakop ini.
Ginkalipay man sini ang pagbulig sang pila ka mga ahensya sang gobyerno sa ila agud mangin positibo ang resulta.
