Nagpanindugan si Former Buenavista, Guimaras Mayor Eugene Reyes nga wala siya naigo-an sa ginpahayag sang Guimaras Electric Cooperative (GUIMELCO) nga ginagamit lamang ang issue sa kuryente para sa politika.
Sa interview sang Bombo Radyo kay Former Mayor Reyes, iya ginpahayag nga ang interes sang iya tinutuyo amo ang agud nga maathagan ang mga konsumidor sang nasambit nga kooperatiba kon ngaa tuman ka taas ang rate sang ila nga kuryente.
Suno kay Reyes, sang nagpanaog siya sa iya pinakaulihi nga termino, yara lamang sa P12 ang kada kilowatt sang rate sang kuryente.
Gin-athag man sang natungdan nga indi bangud sa filing sang candidacy kag didto lang sila nga nagpanawagan, bangud para sa iya, ini ang insakto nga tion agud ma-eksplekar sang GUIMELCO sa mga pumuluyo ang mataas nga rate sang kuryente.
Ginkwestyon man sini ang mga taga-GUIMELCO kon ngaa nagakuha ang kooperatiba sang P37 nga rate sa pila ka mga independent power suppliers.
Gintumod man ni Reyes ang indi transparent nga agreement sang kooperatiba, kon sa diin, nagapati ini nga indi competitive ang bidding nga ginpatuman sa mga power suppliers.
Nahibaluan nga si Reyes ang liwat nga magapapili bilang alkalde sa Buenavista, Guimaras, kon sa diin, mangin bise-alkalde sini si incumbent Sangguniang Bayan Member Atty. Vincent De Asis.
