𝗜𝗟𝗢𝗜𝗟𝗢 𝗖𝗜𝗧𝗬 – Ginakabig sang Commission on Elections (COMELEC) nga isolated case lang ang natabo nga inaway sa tunga nanday San Joaquin, Iloilo Mayor Ninfa Garin kag Vice Mayor Marvigrace Lago-Getuya sa gwa mismo sang munisipyo sang San Joaquin, Iloilo.
Nahibaluan nga hinablos ni Garin si Getuya bangud pakaisa sang alkalde ang iloy sang bise alkalde.
Sa interview sang Bombo Radyo kay Atty. Reinier Layson, Provincial Election Supervisor sang COMELEC-Iloilo, iya ginpahayag nga gin-imbestigaran na sang iya election officer sa San Joaquin ang natabo.
Suno kay Layson, wala man sang may nagreklamo sa ila talatapan sa kampo sang mga Garin kag Getuya rason nga wala man sila sang dapat nga desisyunan.
Una naman nga nagdepensa ang kampo sang mga Garin nga away pamilya lang ang natabo.
Kun balikan, sa video nga ginpadala sa Bombo Radyo, makita nga ginsaruso ni Mayor Garin si Vice Mayor Getuya.
Diri kag ginsukmaan sang ni Mayor Garin si Vice Mayor Getuya kun sin-o ini kag ano lang ini sang una.
Natabo ang pag-inaway sang magtiya matapos nag-file sang iya certificate of candidacy (COC) si Mayoral Candidate former Sangguniang Bayan Member Atty. Joe Abad Lazaro nga ginasuportahan ni Vice Mayor Getuya.
Samtang si Mayor Garin naman ang nagasuporta sa iya hinablos nga si 1st District Board Member Marcelo Valentine Serag nga mapadalagan bilang alkalde bunggo kay Lazaro.
Nahibaluan nga ang tatay ni Board Member Serag ang utod ni Mayor Garin.
Magluwas sa bise alkalde, nagbaisay man sanday Mayor Garin kag pakaisa sini nga iloy ni Vice Mayor Getuya.
