Gintawag ni former Iloilo City Councilor Plaridel Nava nga mga ‘suplada’ sanday former Iloilo City Lone District Rep. Julienne “Jam-Jam” Baronda kag former Mayor Jed Patrick Mabilog.
Ini kasunod man sang ila pagkitaay sa Sandiganbayan kaangot sa arraignment sa kaso ni Mabilog.
Sa interview sang Bombo Radyo kay Nava, iya ginpahayag nga wala naman siya sang mahimo bangud nagsakit gid ang buot ni Mabilog kag Baronda batok sa iya.
Suno kay Nava, nagalaum siya nga madayon na gid ang arraignment sang anay alkalde sa masunod nga bulan.
Gintumod man sang natungdan nga sang nagsulod na sa hulot si Mabilog nagtulokay lang sila apang, wala na nakabugnohanay.
Gin-athag man sini nga sa masunod nga arraignment, indi na sila magakitaay ni Mabilog kag Baronda bangud patigayonon ini sa Nobyembre 22, 2024 kasunod man sang pag-postpone sini subong nga adlaw.
Kon balikan sang 2015, ginpasaka nanday Nava kag anay Iloilo Provincial administrator Manuel Mejorada ang kaso nga grave misconduct, dishonesty, kag conduct prejudicial to the best interest of the service.
Ini bangud sa paghatag sang lloilo City government sang kontrata sa 3L Towing Services nga wala nag-agi sa public bidding.
Nahibaluan nga sa ginpatigayon nga arraignment subong nga adlaw, yara lang sa likod nanday Mabilog kag Baronda si Nava nga nagapungko.
