Ginakabig sang Commitee on Transportation nga isa ka pagpangbastos sa kasuguan sang Iloilo City ang ginhimo nga pagkumos kag paghaboy sang driver sang gin-issue nga citation ticket sang traffic enforcer.
Sa interview sang Bombo Radyo kay Iloilo City Councilor Sedfrey Cabaluna, iya ginpahayag nga kon mapamatud-an gidman nga naglapas ang driver sa layi, kinahanglan nga pangatubangon sini ang mga penalidad nga igapasaka batok sa iya.
Suno kay Cabaluna, kinahanglan nga hugton sang Iloilo City Traffic Management Unit (ICTMU) ang ila pagpatuman sang traffic enforcement sa dalan.
Gin-athag man sang natungdan nga wala gina-tolerar sang konseho ang amo nga akto nga ginpakita sang driver.
Nagpanawagan man ini sa mga motorista nga hatagan sang respeto ang traffic enforcers sang syudad bangud nag-agi ini sila sa ma-id-id nga training.
Nagalaum man si Cabaluna nga indi ini pagsundon sang iban pa nga mga motorista bangud indi ini maayo nga ehemplo sa kadam-an.
