Suspendido nga wala sang sweldo ang silot sang Philippine Basketball Association (PBA) batok kay John Amores matapos ang insidente nga may gintiro ini sa Lumban, Laguna sang Septyembre.
May ginplastar man nga kondisyon para tugutan siya nga maghampang liwat sa liga.
Gin-anunsiyo ini nanday Atty. Ogie Narvasa, legal counsel sang PBA, kag commissioner Willie Marcial.
Suno kay Narvasa, dapat nga makakuha sang clearance gikan sa iya nga counselors si Amores bag-o siya tugutan nga maghampang liwat.
Apang tugutan naman si Amores nga magtambong sa practice sang team samtang suspendido ini.
Mabaton man ni Amores ang iban pa niya nga sweldo kag benepisyo magluwas sa sweldo niya nga natalana sa mga hampang nga suspendido siya.
Ginpahayag ni Marcial nga nakig-angot man ang liga sa Games and Amusements Board (GAB) nahanungod sa desisyon.
Una diri, ginpahayag sang GAB nga posibleng indi na pagpasugtan si Amores nga makahampang sa professional leagues.
Paathag ni Narvasa nga ang ila nga desisyon ang base sa mga pagsulundan sang PBA nga ginlapas ni Amores, kag indi direkta nga naangot sa ginkaulamiran niya nga kaso.
Kaupod ni Amores ang iya nga utod nga ginkasuhan sang attempted homicide bangud sa insidente.
Nahilway sila matapos magbayad sang piyansa.
