Ginpaathag sang isa ka public health expert ang nahanungod sa bipolar disorder nga amo ang ginapahayag nga kondisyon sang asawa nga nagpatay sa iya bana sa Zarraga, Iloilo.
Sa amo nga insidente, ang biktima amo si Eduardo Nodque, 61 anyos, kag isa ka engineer samtang ang asawa sini amo si Mary Joy Nodque, 59-anyos, retired teacher nga suspek sa krimen kag nag-ako man nga siya ang nagpatay sa iya bana.
Sa interview sang Bombo Radyo kay Dr. Philip Ian Padilla, iya ginpahayag nga ang bipolar disorder isa ka mental illness nga nagatuga sang indi normal nga pagbag-o sa modo, enerhiya, lebel sang aktibidad, kag konsentrasyon sang tawo nga masami nagapabudlay sa iya sa paghimo sang iya mga naandan nga ulubrahon.
Suno kay Dr. Padilla, sa bahin ni Nodque, may yara sang psychotic nga elemento ang iya kondisyon bangud nga may yara ini sang naeksperyensiyahan nga hallucination.
Nahibaluan nga gin-ako sang asawa nga may nagahutik sa iya nga lampusan sang dumbbell ang iya bana samtang nagakatulog ini sa sofa sang ila balay nga nagresulta sa kamatayon sang biktima.
