Ginakabig sang Philippine Drug Enforcement Agency (PDEA) Region 6 nga nangin epektibo ang ila ginpatuman nga Oplan Harabas ukon surprise drug test sa mga driver sa Western Visayas.
Sa interview sang Bombo Radyo kay Ma. Graziella Tanaleon, Public information Officer sang PDEA Region 6, iya ginpahayag nga nangin madinalag-on ang ila programa bangud man sa bulig sang Land Transportation Office (LTO).
Suno kay Tanaleon, kaupod ang nasambit nga talatapan, hugot nga ginpatuman sa nagkalain-lain nga terminal sa rehiyon lakip ang mga ceres, airport, traditional and modernized jeepney terminals ang amo nga tikang.
Ini agud nga iduso ang kampanya sang safety nga pagbyahe sa dalan nga hilway sa impluwensya sang iligal nga druga.
Ginpahayag man sang natungdan nga nakit-an nga may pagnubo sa mga drug related incidents sa dalan sugod sang gin-umpisahan ang Oplan Harabas sa rehiyon.
Bukas naman ang ila nga rehabilitation desk kon may mga tuyo nga mag-surrender ukon magpa-test.
