Indi lamang mga armas ang ginapadala sang North Korea sa Russia kundi pati mga soldado agud nga mabuligan ang Moscow sa giyera sini batok sa Ukraine.
Suno kay Ukrainian President Volodymyr Zelenskyy, mas nagadaku ang alyansa sang duha ka pungsod kag naglab-ot na sa punto nga nagpadala ini sang tropa para nga may dugang sa pwersa sang Russians nga amo ang nagasalakay sa teritoryo sang Kyiv.
Pahayag sang Ukrainian president, kinahanglan nga magdaku man ang hulag ang Ukraine kag mga kaalyado ini para mabatuan ang mga nagadalom nga alyansa sang Russia sa iban nga nasyon.
Nagpanawagan man liwat si Zelenskyy sang dugang nga military support, indi lamang sa military equipment, kundi mas daku nga pressure nga indi na masarangan sang Russia para indi na magdaku ang giyera sa Europa.
Una na diri, matandaan nga wala nagmadinalag-on si Zelenskyy sa hingyo sini sa ila mga kaalyado nga tugutan sila nga maggamit sang longer-range missiles para nga atakehon ang military targets sang Russia agud nga mabuhinan ang ila kapasidad sa giyera.
Magakitaay kuntani ang Western leaders sa Germany sang nagligad nga semana agud nga diskusyunan ini nga problema, apang naatrasar ang pagsinapol bangud wala nakabyahe si United States President Joe Biden agud pasulabihon anay ang sitwasyon sa Florida nga ginlaslasan sang Hurricane Milton.
Subong nga semana ginalauman nga magakadto ini sa Germany para madayon na ang meeting kun sa diin ang Ukraine-Russia war ang nagapanguna sa agenda.#
