Gintuad sang utod sang retired teacher nga nagpatay sa iya bana sa Zarraga, Iloilo nga ginlain nila ang brand sang bulong nga ginainom sini, rason nga na-trigger ang ginasuprer sini nga bipolar disorder.
Ang biktima amo nga insidente amo si Eduardo Nodque, 61-anyos, retired engineer, samtang ang ginakabig nga suspek amo si Mary Joy Nodque, retired teacher, 59-anyos, residente sang nasambit nga lugar.
Sa interview sang Bombo Radyo kay alyas “Inday”, utod sang manunudlo, iya ginpahayag nga posible nga wala nakasaho ang iya utod rason nga wala ini nag-epekto sang maayo sa iya ikaayong lawas.
Suno kay Inday, kahapon nga adlaw, nagdesisyon sila nga ibalik sa naandan nga brand sang bulong nga gina-inom sang manunudlo kag sa subong, yara na ini sa maayo nga kahimtangan.
Ginsaysay man sini nga sa subong, nakatulog na sang tayuyon ang iya utod.
Gin-athag man sang natungdan nga lima tubtob anom ka adlaw nga gina-inom sang retired teacher ang amo nga brand sang bulong.
Nagbinag-binag man si Inday nga kon temprano pa nga natalupangdan ang epekto sang bulong, kontani wala na nila ginbaylohan ang brand sini.
Nahibaluan nga ginlamposan sang retired teacher sang dumbbell ang iya nga bana bangud sa ginapahayag nga may naghutik sa iya.
