Nakatalana nga ipaidalum sa medical test sang Iloilo City Social Welfare and Development Office (CSWDO) subong nga adlaw ang duha ka mga bata nga nakit-an matapos ang masobra 20 ka oras nga nadula sa Brgy. Baldoza, La Paz, Iloilo City.
Ang mga na-missing amo sanday John Ronald Linagad, 4, kag Camelle Zhynn Jareol, 5, lunsay residente sang Zone 3, Barangay Baldoza, La Paz.
Sa interview sang Bombo Radyo kay Mary Grace Centino, Assistant CSWDO Officer, iya ginpahayag nga gilayon nagpadulong ang ila talatapan sa balay sang duha ka mga kabataan agud nga obserbahan ang sitwasyon nila matapos halos isa ka adlaw nga nadula.
Suno kay Centino, ang ila talatapan ang maga-provide sang salakyan agud nga makuha ang duha ka mga kabataan.
Gintumod man sini nga ang lalaki nga bata amo ang nakitaan sang stress, samtang ang babaye naman ang ginpapahuway matapos man nga naghingyo ang iya nga ginikanan.
Gin-athag man sini nga iga-check ang physical nga bahin sang kabataan bangud nakit-an man nga may lagob kag pilas ang lalaki nga bata.
Ginarespeto naman sang talatapan ang ginapatihan sang ginikanan nga faith healer.
Nagpasalig naman ang natungdan nga ipaidalom sa psychological test ang kabataan kon matapos na ang medical test.
