Arestado ang isa ka indibidwal sa Brgy. Veterans Village, City Proper, matapos nga nakuhaan sang 15 ka sachets sang suspected shabu.
Ini kasunod man sa ginpatigayon nga buy-bust operation sang Iloilo City Police Station (ICPS) 1.
Ang subject amo si Leonard “Nonoy” Higato, 35, may asawa, kag residente sang nasambit nga lugar.
Sa interview sang Bombo Radyo kay Police Captain Roque Gimeno lll, Officer-In-Charge sang ICPS-1, iya ginpahayag nga malawig nga monitoring ang ila ginpatuman antes nga natigayon nga nadakpan ang amo nga subject.
Suno kay Gimeno, nabaklan ang suspetsado sang isa ka sachet gamit ang P3,000 buy-bust money kon sa diin, nakuha man sa iya nga paghinakop ang 15 sachets sang suspected shabu nga may kabug-aton nga 52 gramos.
Naglab-ot naman sa P353,600 ang balor ukon standard drug price sang iligal nga druga ang narekober sa subject.
Ginpanginwala naman sang suspek nga siya ang nagagamit sang iligal nga druga, kon sa diin preso na subong sa Iloilo City Police Station -1 kag magapangatubang sang kaso nga paglapas sa RA 9165 ukon Comprehensive Dangerous Drugs Act of 2002.
