Nagpadayaw ang North Korea nga masobra isa ka milyon ka mga bataon pa nga mga indibidwal ang nagsulod sa ila militar subong nga semana bilang pagpabaskog pa sang ila pwersa batok sa South Korea.
Suno sa official Korean Central News Agency, masobra sa1.4 million youth league officials, kabataan, kag mga estudyante sa ila pungsod ang nagboluntaryo nga magsulod — ukon magsulod liwat — sa Korean People’s Army sang Oktubre 14 kag Oktubre 15.
Nahibaluan nga malawig na ang mandatory military service sang North Korea para sa mga lalaki, kag pila ka beses na sini nga ginasiling nga madamo gihapon ang nagapa-enlist ilabi na kun magtaas ang tension batok sa South Korea kag sa Estados Unidos sang Amerika.
Sang Martes, matandaan nga ginpasigabong sang North ang symbolic nga mga dalan kag riles nga nagaangot sang South kag North Korea.
Ini ang kasunod sang ila paandam nga pananglitan makakita sila sang bisan isa lang ka drone nga magsulod sa Pyongyang, kabigon na nila ini nga deklarasyon sa giyera.
Una na nga nagpanginwala ang South nga sila ang nagpadala sang mga drone sa North, apang ginsiling naman sang Pyongyang nga may klaro sila nga ebidensya nga may official involvement sang Seoul sa amo nga drones kag gina-alegar man sini nga lakip sa ginapadala sang South amo ang anti-regime propaganda leaflets kag ginpalapta sa kapital sang North.
Wala gihapon sang kaathagan subong kun sin-o gid man ang sa likod sang pagpalupad sang drones.
Apang kun balikan ang ini nga istilo, ang South Korean activists ang nagpadala na anay sang anti-Pyongyang regime leaflets sa border sang duha ka pungsod kag nagpaibwal sang kaakig sang North rason nga nagpalupad man ini sang mga balloon pakadto sa South nga may dala nga mga basura.
Lakip man anay sa ginpadala sang mga aktibista amo ang mga materyales kaangay sang USB drives nga nagaunod sang K-pop tracks kag K-dramas.
Ginakaugtan gid ini sang North bangud sensitibo sila kaayo kag ginadumilian gid ang ila nga mga pumuluyo nga maka-access sa popular nga kultura sang South Korea.#
