Ginapatihan nga kaakig kag pagtimalos ang nagtulod sa suspek kun ngaa ginpatay sini ang mag-asawa nga senior citizen sa Barangay Lantangan, Carles, Iloilo.
Ang mga biktima amo sanday Violeta Bolohabo, 71-anyos kag Jesus Bolohabo, 75-anyos nga lunsay residente sang amo nga lugar.
Ang suspek naman amo si Wenrey Belasa, 31, residente sang Brgy. Bayuyan, Estancia, Iloilo.
Sa impormasyon nga nakuha sang Bombo Radyo, ginsiling sang suspek nga may dumot ini sa babaye nga biktima nga ginapahayag nga isa ka surhana bangud suno sa suspek, ginhiwitan sang tigulang ang ginatawag nga boss ni Belasa.
Nahibaluan nga pauli na ang mag-asawa halin sa gintambungan nga kahiwatan sa plaza sang gintiro sang suspek kun sa diin lunsay dead on the spot ang mga biktima.
Nalagyo pa ang suspek apang naaresto sang otoridad sa Barangay Botongon, Estancia, Iloilo sa hot pursuit operation.
Preso na ini sa Carles Municipal Police Station kag mahimo magpangatubang sang sampaw-sampaw nga kaso bangud magluwas sa armas, nakuhaan pa gid ini sang marijuana.
