Hilway na sa katalagman ang isa ka Ilongga Overseas Filipino Worker matapos nakabalik na sa Iloilo halin sa Lebanon.
Si Donna Jean Gabasa-Berniz, 34 anyos, residente sang Botlog, Concepcion, Iloiolo, ang labing una nga repatriated Ilongga OFW nagikan sa nasambit nga pungsod.
Siya ang 10 ka tuig na nga nagatrabaho bilang OFW sa Lebanon.
Sa interview sang Bombo Radyo kay Berniz, iya ginpahayag nga nagatinir siya sadto sa Meiss El Jabal, isa ka village sa Lebanon nga malapit sa border sang Israel, apang nagsaylo man sila sang lugar bangud sa kahangawa.
Nagtinir sila sang iya employer sa Hadath, isa ka banwa malapit sa Beirut sa pagdumdom nga mangin safe na sila gikan sa pagpalupad sang missile.
Apang isa ka semana antes si Berniz nakapauli sa Iloilo, nakabaton sila sang warning nga kinahanglan na nila nga mag-evacuate sa sulod sang duha ka oras bangud bombahan ang ila lugar sa Hadath.
Suno sa iya, target sang Israeli military ang leader sang Hezbollah sa diin nagdumdom ang mga ini nga yara sa Hadath.
Antes maubos ang duha ka oras, nakapalayo na sanday Berniz kag iya employer sa building nga ila ginatiniran kag gilayon nga nag-umpisa na ang pagbomba.
Nangin emosyonal man ang Ilongga OFW bangud indi man kuntani niya luyag nga magpa-repatriate bangud napalapit na sa iya tagipusuon ang iya employer kag pamilya sini apang indi na safe nga istaran ang ila lugar.
Mangin ang employer ni Berniz ang nagapang-alang man kuntani nga pasugtan ini nga magbalik sa Pilipinas apang ginkonsidera man niya ang safety sang Ilongga.
Suno kay Berniz, tuman ang iya pagpasalamat sa Iloilo Provincial Government, ilabi na kay Governor Arthur Defensor Jr., sa Bulig Ilonggo kag sa Public Employment Service Office Head Cynthia Dario nga naga-monitor sa iya samtang yara siya sa Lebanon, gin-ubayan tubtob nga makapauli sa Iloilo.
Sa pagkamatuod, mismo ang PESO Iloilo Province ang nagsugat kay Berniz sa Iloilo Airport.
Nagapangabay ang Ilongga OFW sa mga nabilin nga Ilonggos/Filipinos sa Lebanon nga kun indi na safe ang ila nahamtangan, tion na agud nga magpauli.
“𝑨𝒏𝒈 𝒌𝒘𝒂𝒓𝒕𝒂 𝒎𝒂𝒌𝒊𝒕𝒂, 𝒂𝒏𝒈 𝒌𝒂𝒃𝒖𝒉𝒊 𝒊𝒔𝒂 𝒍𝒂𝒏𝒈” -𝘽𝙖𝙣𝙖 𝙨𝙖𝙣𝙜 𝙧𝙚𝙥𝙖𝙩𝙧𝙞𝙖𝙩𝙚𝙙 𝙄𝙡𝙤𝙣𝙜𝙜𝙖 𝙊𝙁𝙒
Wala na sang nerbyus kag makatrabaho na sang maayo ang bana ni Donna Jean Gabasa-Berniz matapos makapauli nga safe.
Sa interview sang Bombo Radyo kay Eladio Berniz, iya ginpahayag nga makapila man ka beses nga naghingyo siya sa iya asawa nga magpauli na lang bangud sa nagakatabo sa Lebanon.
Suno sa iya, indi siya maayo makatrabaho bangud gina-nerbyos sa kahimtangan sang iya asawa.
Apang nagapasalamat ini sa gobyerno nga natigayon nga makabalik sa Iloilo nga safe ang Ilongga OFW.
Dugang pa sang bana, ang kwarta mahimo pa nga makit-an apang ang kabuhi isa lang.
“𝑲𝒖𝒏 𝒂𝒏𝒐 𝒂𝒏𝒈 𝒑𝒘𝒆𝒅𝒆 𝒏𝒈𝒂 𝒎𝒂𝒉𝒂𝒕𝒂𝒈 𝒔𝒂𝒏𝒈 𝑰𝒍𝒐𝒊𝒍𝒐 𝑷𝒓𝒐𝒗𝒊𝒏𝒄𝒊𝒂𝒍 𝑮𝒐𝒗𝒆𝒓𝒏𝒎𝒆𝒏𝒕 [𝒔𝒂 𝒓𝒆𝒑𝒂𝒕𝒓𝒊𝒂𝒕𝒆𝒅 𝑰𝒍𝒐𝒏𝒈𝒈𝒂 𝑶𝑭𝑾], 𝒉𝒂𝒕𝒂𝒈𝒂𝒏 𝒔𝒊𝒚𝒂” -Gov. Arthur Defensor Jr.
Ginamanduan ni Iloilo Governor Arthur Defensor Jr. ang Public Employment Services Office nga hatagan sang ano man nga assistance ang Ilongga OFW matapos nga nag-repatriate ini halin sa Lebanon.
Sa interview sang Bombo Radyo kay Cynthia Dario, Head sang PESO, iya ginpahayag nga gin-monitor sang Bulig Ilonggo ang kahimtangan ni Berniz halin sa Lebanon tubtob sa pagpauli niya sa Iloilo sa diin sila mismo ang nagsugat sa airport.
Suno kay Dario, mahimo maka-avail sang P10,000 nga financial assistance si Berniz.
Sa subong, may yara sang 85 ka mga Ilonggo OFWs sa Lebanon.
