Ginalantaw sang Committee on Transportation sang Iloilo City Council nga isa ka kompetisyon sa tunga sang Grab kag Taxi operators ang paghatag sang maayo nga serbisyo sa mga pasahero.
Sa interview sang Bombo Radyo kay Iloilo City Councilor Sedfrey Cabaluna, Head sang Committee on Transportation, iya ginpahayag nga madamo sang aspeto ang kinahanglan lantawon, apang, isa ini ka kompetisyon kag kon tuyo sang isa ka service transport nga pilion sang pasahero, kinahanglan nga i-improbar man nila ang ila serbisyo.
Suno kay Cabaluna, isa man ka innovation ang ginapakita nga serbisyo sang Grab bangud nagagamit sila sang mas moderno nga teknolohiya nga makabulig man sa safety sang pasahero.
Ginpatpat man sang natungdan nga dapat sekyaron sang Land Transportation Franchising and Regulatory Board (LTFRB) kon viable ang mga franchises sang mga nasambit nga service transport.
Nahibaluan nga nangin mainit ang banggianay sa tunga sang Grab kag taxi operators matapos nga ginkwestyon sang Association of Taxi Operators in Panay (ATOP) ang operasyon sang Grab car sa Western Visayas.
