Isa ka daog na lang ang kinahanglan sang Barangay Ginebra agud nga makasulod na sa finals sang PBA Governors’ Cup.
Ini matapos nakuha na ang 3-2 nga lead sa best-of-seven semifinals batok sa San Miguel Beermen kasunod sang Game 5 sa Ynares Center sa Antipolo subong nga gab-i kun sa diin nagtakop ang hampang pabor sa Gin Kings, 121-92.
Bisan indi kabahin sang starting lineup, nagpakita sang pwersa si RJ Abarrientos, nagpaulan sang 28 puntos, kag amo ang nagpanguna sa tanan nga scorers sa hampang magluwas pa sa iya tatlo ka rebounds kag duha ka assists.
Ginsiling sini nga wala man niya ginpilit ang iya hampang kag nagsunod lang sa sistema sang Gin Kings partikular sa depensa kag opensa.
“Wala naman ako masyadong iniisip ngayon, eh. I just stick on the system. Sabi nga ni coach Tim [Cone] kanina, ‘di ko pinipilit shots ko. I just go with the flow sa offense and sa defense,” pahayag ni Abarrientos sa postgame press conference. “I’m not forcing anything. Ginagawa ko lang part ko coming from the bench.”
Antes sini, ginpanas sang Ginebra ang 13-point deficit sa first period kag wala na nagbalikid sang nalapawan na sini ang San Miguel, 29-17, sa second period agud makuha ang 63-50 lead. Ginbubo man sang Gin Kings ang pwersa batok sa Beermen sa fourth period paagi sa 29 points batok sa 13 sang kasumpong.
Ang former league MVP nga si Scottie Thompson ang nakaamot sang 22 points, samtang si Justin Brownlee nga preska sa 49-points sa Game 4 ang nakahaboy sang 18 points kag nine rebounds subong nga sambuwa.
Nanguna naman sa team nanday Jorge Gallent amo ang import nga si EJ Anosike nga may 21 markers samtang ang eight-time MVP June Mar Fajardo ang may 17-points kag 18-rebounds.
Ang Ginebra — nga ginlutos sang TNT Tropang Giga sa Governors’ Cup finals sang 2022-2023 season — ang mahimo nga makatapos sa serye sa Game Six sa Domingo. Mahimo naman makapangapyot ang San Miguel kag butungon ang Gin Kings sa do-or-die nga Game 7. #
Scores
Ginebra 121 – Abarrientos 28, Thompson 22, Brownlee 18, J. Aguilar 15, Ahanmisi 13, Holt 9, Cu 4, Pinto 3, Adamos 2, Devance 2, Pessumal 2, R. Aguilar 2, Mariano 1.
San Miguel 92 – Anosike 21, Fajardo 17, Perez 16, Lassiter 16, Trollano 7, Ross 4, Enciso 4, Cruz 3, Brondial 2, Romeo 2, Nava 0, Tautuaa 0, Rosales 0.
Quarters: 34-33, 63-50, 92-79, 121-92.
