Balik na sa court National Basketball Association (NBA) ang Chicago Bulls guard nga si Lonzo Ball matapos ang tatlo ka operasyon sa iya tuhod kag masobra duha ka tuig man nga pagpahuway.
Ang pagbalik sang 26-anyos nga guard ang ginhimo kadungan sang hampang sang Bulls batok sa Minnesota Timberwolves sa preseason.
“Checking in for the Chicago Bulls! No. 2! Lonzo Ball!,” ang anunsyo sa arena nga madugay man nga ginkalangkagan sang fans.
Ini ang iya una nga hampang halin sang Enero 14, 2022 kag ginhatagan sang standing ovation sang mga tumalan-aw sa United Center sang naka-tres ini gilayon. Nagtakop ang hampang nga may 10 points, 1 assist, kag 1 rebound si Ball sa 15 minutos nga pag-upod sini sa Bulls.
125-123 ang score pabor sa Chicago.
“It felt a lot better playing than watching, I’ll say that much,” suno sa 26-anyos nga basketball star. “I can’t even really put into words how I felt out there.”
“Just blessed, man,” dugang ni Ball. “There were a lot of people that helped me get here, not just myself. Just to see the crowd and all the love I get from the city, man, you cannot replicate that in any type of way. And it’s real.”
Nahibaluan nga nagpaidalom si Ball sa meniscus operation sang Enero 2022, ginsundan sang arthroscopic surgery, kag nagpaidalom pa gid sa cartilage transplant surgery.
Apisar madamo na ang naagyan, daku ang paglaum sang former No. 2 overall draft pick nga mabuligan niya ang Bulls subong nga season.
May isa pa ka preseason game ang Bulls batok sa Clevecland Cavaliers 8:00 buwas sa aga (PH TIME) antes ang pagbukas sang regular season para sa team sa New Orleans sa Oktubre 23.#
