Dead on arrival ang driver sang motorsiklo matapos nakabunggo sa armored van sa boundary sang Tabucan kag Molo, Iloilo City.
Ang driver amo si Alyas Janjan, 28-anyos, samtang ang back rider sini amo si Alyas Toto, 31 anyos.
Ang driver naman sang armored van amo si Alyas Bongbong, 35-anyos.
Sa interview sang Bombo Radyo kay Patrolman Rolly Lapido, Traffic Investigator sang Traffic Enforcement Unit, iya ginpahayag nga naghalin sa distrito sang Mandurriao ang armored van kag padulong kontani sa porsyon sang Molo.
Ang motorsiklo naman naghalin sa distrito sang Molo kag padulong sa Airport, Mandurriao, apang nag-overshoot ang motorsiklo kag nabunggu-an ang armored van.
Suno kay Lapido, lunsay may helmet ang sakay sang motorsiklo, apang bangud sa impact sang pagkabunggo, ginbawian sang kabuhi ang driver samtang kritikal naman ang kondisyon sang angkas sini.
Sa subong, padayon nga ginabulong sa Western Visayas Medical Center ang angkas sang motorsiklo.
