Magahimo sang kaugalingon nga imbestigasyon ang Guimaras Police Provincial Office (GPPO) kaangot sa pagkahulog sang pulis sa sakayan-pandagat sa Nueva Valencia, Guimaras.
Ang biktima sa amo nga insidente amo si Police Staff Sergeant Mechael Gatinao, 42-anyos, kag residente sang Sitio Sirum, Brgy. San Nicolas, Buenavista Guimaras.
Sa interview sang Bombo Radyo kay Police Colonel Rhea Santos, Provincial Director sang Guimaras Police Provincial Office, iya ginpahayag nga nagmando na ang talatapan sang request sang autopsy result sang biktima kag sa subong, nagahulat na lang sila sang schedule halin sa forensic unit.
Suno kay Santos, ang imbestigasyon man ang makabulig agud nga matumod ang natabo samtang nagalagas ang pulis sa mga iligal nga manogpangisda.
Gin-athag man sini nga sa amo nga tikang, mahimo makit-an kon may liable ukon may changes sa police procedure.
Tuyo man sang talatapan nga mapadalman ang kaso kag makaseparar sang lain nga imbestigasyon sa Nueva Valencia Municipal Police Station agud nga indi maimpluwensyahan sang mga nakaupod sang biktima sa sakayan.
