𝗜𝗟𝗢𝗜𝗟𝗢 – Wala sang katupong nga kalipay ang nabatyagan sang mga Ilonggo nga topnotchers sa Fisheries Technologist Licensure Exam.
Nahibaluan nga walo ka mga graduates gikan sa University of the Philippines (UP) Visayas kag isa halin sa Iloilo State University of Fisheries Science and Technology (ISUFST) Main Campus ang nakasulod sa top 10 pasinawan.
Sa interview sang Bombo Radyo sa Rank 1 nga si AJ March Ryanne Belago Felongco sang Calubihan, Jaro, Iloilo City, iya ginpahayag nga sang una, indi pa siya sigurado kun ano ang kuhaon nga kurso sa UP, tubtob nakita sini nga pinasahi ang Bachelor of Science in Fisheries Program sa diin natun-an naman niya ini nga palangganon.
Si Felongco ang nakakuha sang passing percentage nga 91.75%.
Suno kay Felongco, matapos nakakuha sang pasinawan kag nahibaluan sini nga Rank 1 siya, halos indi siya makapati.
Plano naman sa ulihi ni Felongco nga mangin manunudlo agud mapakigbahin man sini sa ulihing tubo ang nabal-an niya sa sektor sang pangisda.
Samtang suno naman sa Rank 10 nga si Aivie Seterra Padohinog sang San Joaquin, Iloilo, luyag lang sini nga may malakip bilang topnotchers halin sa ISUFST.
Gani amo na lang ang kalipay sini nga nalakip ini sa Top 10.
Si Padohinog ang nakakuha sang passing percentage nga 89.00%.
Nahibaluan nga 1,005 sa 1,509 nga mga examinees ang nakapasar.
Ang pasinawan ang ginpatigayon sang Oktubre 10 tubtob11, 2024, sa mga testing centers nationwide.
