Nagpa-Bombo ang isa ka babaye nga pasahero sang traditional jeep sa Iloilo City matapos nga ginpapanaog siya sang driver apisar wala pa nakalab-ot sa iya destinasyon.
Sa interview sang Bombo Radyo kay alias May, iya ginpahayag nga halin sa Molo, nagsakay siya sa Baluarte nga jeep, kag manaog kuntani sa Plaza Libertad sa City Proper.
May kaupod siya nga mga estudyante sa jeep, apang sang nag-abot na sa dalan Iznart, nagpanaog na ang iban nga mga pasahero kag siya na lamang ang bilin.
Ginpamangkot siya sang driver kun nakabayad na siya, kag sang nagsiling nga nakahatag na siya sang P13, ginbalik sa iya ang plete kag ginsilingan nga magsakay na lang sa lain nga jeep bangud maga-“cutting” ini.
“Ginhambalan ‘ya pa ko nga ‘baw ako pa nagbayad ba’,” suno sa babaye. “Te sala ko na bala kay ginpapanaog ya ko? Pwede bala na?,” pamangkot sini.
Nangusisa naman ang Bombo Radyo kay Mr. Raymundo ‘Boyet’ Parcon, anay presidente sang Iloilo City Loop Alliance of Jeepney Operators and Drivers Association (ICLAJODA). Iya ginpahayag nga obligasyon gid sang driver nga idul-ong ang iya pasahero sa iya destinasyon.
Pahayag ni Parcon, ang ginhimo sang gina-reklamo nga driver ang maathag nga paglapas sa pagsulundan sang Land Transportation Office (LTO).
Ginsaysay sini nga naka-encounter man ini sang una sang kaangay man nga kaso, kag ginpahayag sang LTO nga mahimo ma-suspend ang lisensya sang driver kun desidido gid ang tag-reklamo sa iya complaint.#
