Masobra 20 na ka mga kahoy ang natumba sa Iloilo City bangud man sa mabaskog nga hangin nga dala ni Bagyo Kristine sa Western Visayas.
Sa interview sang Bombo Radyo kay Engineer Niel Ravena, head sang Iloilo City General Services Office (GSO), iya ginpahayag nga nag-combine na sila sang pila ka talatapan lakip na ang Iloilo City Environment and Natural Resources Office (CENRO) sang Department of Environment and Natural Resources (DENR).
Suno kay Ravena, dako nga pagpanghangkat sa ila bahin ang rorok nga naglab-ot sa pila ka dalan sang syudad.
Ginapahamtang naman sa Disaster Waste Area sa Calajunan, Mandurriao ang tanan nga mga natipon nga kahoy.
Gina-ekspektar naman sang talatapan nga madugang pa ang mga kahoy nga matumba kag ila respondehan bangud man sa dala sang malain nga panahon.
Nagpanugyan naman si Ravena sa mga pumuluyo sang syudad nga yara sa coastal barangay nga posible nga magtaas ang tubig ukon high tide karon sa gab-i.
