Ginluthang-patay ang anay Punong Barangay kag incumbent Kagawad sang Barangay San Rafael, Tigbauan, Iloilo.
Ang biktima amo si Joevani Triste, residente sang nasambit nga lugar.
Samtang ang suspek amo si John Castro Jr.
Sa interview sang Bombo Radyo kay Emilio Triste, utod sang biktima, iya ginpahayag nga antes natabo ang insidente, naga-clearing ang biktima sang mga kahoy nga natumba sa ila dalan upod man ang pila ka mga tanod.
Suno kay Triste, may haboyanay sang istorya nga natabo sa tunga sang iya utod kag sa suspek, nga nagresulta man sa indi pag-intindihanay.
Gin-athag man sini nga sang naabtan na sini ang iya utod, nagakaya na kag duguon.
Gintumod man sang natungdan nga posible pagpangimon sa iya utod ang rason kon ngaa gintiro sang suspek ang biktima.
Ginbuyagyag man ni Triste nga ang suspek ang makaduha na ka beses nga nagpangasawa.
Padayon naman ang imbestigasyon sang otoridad kag ang pag-ayam sa suspetsado.
