Naglab-ot sa 56 ka mga pamilya ang gin-evacuate sa Guimaras bangud man sa malain nga tyempo nga dala ni Bagyong Kristine sa isla.
Sa interview sang Bombo Radyo kay Teresita Siason, head sang Guimaras Provincial Disaster Risk Reduction and Management Office (PDRRMO), iya ginpahayag nga kanselado naman ang tanan nga klase kag pila ka mga opisina sa probinsya bangud nagapabilin nga yara sa signal no. 1 ang isla.
Suno kay Siason, nagapabilin man nga suspendido ang byahe sang sakayan padulong man ukon pahalin sa probinsya bangud sa mga dalagko nga paghampak sang balod.
Ginpahayag man sini nga masobra 60 ka mga indibidwal ang na-stranded sa mga pantalan kag sa subong nagapabilin nga ginatatap sang Provincial Social Welfare and Development Office sang Guimaras.
Nagpaandam man ang talatapan sa publiko nga magpabilin nga aligmat ilabi na ang pumuluyo nga yara sa landslide kag coastal areas nga barangay sang probinsya.
