Naglab-ot na sa 37,873 ka mga indibidwal nga ginakabugusan sang 9,456 ka mga pamilya ang apektado sang Bagyo Kristine sa Western Visayas.
Sa interview sang Bombo Radyo kay Raul Fernandez, Director sang Office of the Civil Defense (OCD) Region 6, iya ginpahayag nga may yara sang 58 ka mga evacuation centers sa rehiyon agud nga magtatap sa mga maapektohan sang bagyo.
Suno kay Fernadez, 1,207 families ukon 4, 196 ka mga indibidwal ang yara subong sa mga evacuation centers nakahamtang.
Ginpahayag man sini nga halos tanan sa rehiyon lakip ang Aklan, Negros Occidental, Capiz kag Iloilo ang may mga evacuees.
Gin-athag man sini nga ‘closely monitoring’ sila sa palibot sang probinsya agud nga gilayon nga makaresponde sa posible halit nga dala ni Bagyo Kristine.
Nagpahanumdom man ang Regional Director sang amo nga ahensya nga mangin alerto kag gilayon nga mag-evacuate kung may mga pagbaha na sa lugar.
