CARLES, ILOILO – Nabaton na sang Municipal Disaster Risk Reduction and Management Office sang Carles, Iloilo ang panawagan sang pila ka mga pumuluyo sa isla Gigantes sang bulig ilabi na sang bugas bangud na-untat ang ila pagpangisda tuga sang Bagyo Kristine.
Sa interview sang Bombo Radyo sa Staff sang MDDRMO Carles nga nagpahinago lang sang iya pangalan, iya ginpahayag nga wala gilayon naka-communicate sa ila ang mga pumuluyo nga nagapangayo bulig nga bukas man kuntani ang ila nga komunikasyon.
Sa now deleted post sa facebook sang isa ka residente sang isla, nagapanawagan siya sa Carles LGU kag sa Provincial Government sang bulig nga mahatagan sila sang ayuda bangud wala na sila sang bugas.
Suno sa staff, naka-post man ang residente sa social media account buot silingon may yara ini sang internet connection nga kuntani gindirekta na lang nila ang pagpangayo sang bulig sa ila opisina.
Pahayag niya, bangud nabaton na ang concern, i-validate ini sang opisina agud nga mahatagan sang ayuda ang mga apektado.
Sa pagkamatuod dugang pa sang natungdan, 24/7 nga naka-standby ang monitoring team sang MDRRMO kag kooperasyon ang ila ginapangayo halin sa mga pumuluyo.
Nagapanawagan man ang natungdan nga sa baylo unahon i-post sa social media ang concern ukon insidente sang pagkaguba sang balay ukon palangabuhian, gilayon nga i-direkta ini sa mga concerned agencies bangud aktibo man ang mga ini sa ila serbisyo.
