Wala nakalampuwas ang Antique sa mabaskog nga hangin kag madamol nga ulan nga dala ni Bagyo Kristine.
Sa interview sang Bombo Radyo kay Broderick Train, Head sang Provincial Disaster Risk Reduction and Management Office (PDRRMO), iya ginpahayag nga padayon ang ila nga monitoring kag validation sa nangin halit nga dala sang nasambit nga bagyo.
Suno kay Train, nagapabilin nga yara sa maayo nga kondisyon ang dalan ilabi na ang mga mayor nga taytay nga naagyan sang mga motorista.
Gintumod man sang natungdan nga may mga balay sa social sector sang probinsya ang apektado sang bagyo, kon sa diin, nagkalaguba bangud man sa hangin kag natumba nga mga kahoy.
Gin-athag man sini nga wala man sang pagbaha kag landslide nga natuga ang bagyo kag lunsay hangin kag pag-inula-ulan lamang ang nabatyagan sa probinsya.
Sa subong, yara sa 13 ka mga balay ang totally damaged, samtang masobra 100 naman ang partially damaged, sa diin, padayon pa ang iban nga gina-consolidate sang talatapan.
