Patay ang tatlo ka journalists sang naglunsar sang airstrike ang Israel samtang sila ang nagakatulog sa isa ka guesthouse sa southeast Lebanon.
Natabo ini alas tres sang kaagahon sang Byernes kun sa diin nalakip sa mga biktima amo ang camera operator nga si Ghassan Najjar kag broadcast technician nga si Mohammed Rida sang Al-Mayadeen TV nga naka-base sa Beirut.
Patay man ang camera operator nga si Wissam Qassim nga naga-trabaho sa Al-Manar TV sang Hezbollah group.
Ini nga airstrike amo ang latest sa serye sang Israeli attacks batok sa journalists nga naga-cover sa giyera sa Gaza kag Lebanon halin pa sang nagligad nga tuig.
Wala pa nagkomento ang Israel kun sin-o ang ila target sa amo nga atake, apang ginpakamalaot na ini sang human rights groups kag gintawag nga war crime ang pagpatay sa mga taga-media nga protektado kuntani sa idalom sang international humanitarian law.
Nahibaluan nga base sa October report sang Committee to Protect Journalists, 128 na ka journalists kag media workers ang ginpangpatay sa Gaza kag Lebanon. Ang ginatudlo nga may kahimuan sa sini nga mga pagpang-atake amo ang Israeli forces.#
