Gin-anunsyo ni Ukrainian President Volodymyr Zelensky nga posible nga maga-intra na sa patag-awayan subong nga weekend ang mga soldado sang North Korea nga ginpadala sa Russia.
Pahayag sini, natumod sang Ukrainian intelligence nga gamiton na sang Moscow ang una nga North Korean military sa combat zones sa tunga-tunga sang Domingo kag Lunes.
Wala na ini sang ginhatag nga dugang nga detalye partikular kun sa diin iga-deploy ang North Korean soldiers apang ginsiling sini nga ang deployment isa ka tikang sang Russia agud nga mas maglala ang gyera sa Ukraine.
Nahibaluan nga ini ang labing-una nga large-scale overseas deployment sang North Korean military halin sang Vietnam War.
Base sa Main Intelligence Directorate sang Ukraine nga kilala sa acronym nga GUR, na-detect sang nagligad nga Miyerkules ang North Korean units sa Kursk region matapos ang training sa base-militar sa eastern Russia kag nahatagan na sang mga panapton para sa winter.
Base sa estimates sini, yara sa 12,000 ka mga soldado ang ginpadala sang North Korea lakip na ang 500 ka opisyal kag tatlo ka mga heneral.
Kun basehan naman ang kumpirmasyon sang Estados Unidos sang Amerika, 3,000 ka North Korean troops ang gin-deploy sa Russia kag nagahanas na sa nagkalain-lain nga mga lokasyon.
Tubtub subong, wala ginkumpirma apang wala man ginpanginwala ni Russian President Vladimir Putin kun may mga soldado gid man nga ginpadala sa ila si North Korean leader Kim Jong Un.#
