Igaplastar sang South Korea sa North Atlantic Council ang ginhimo sang North Korea nga pagpadala sang linibo ka mga soldado sa Russia.
Ini nga council amo ang mayor nga decision-making body sang North Atlantic Treaty Organization ukon NATO.
Suno sa NATO, ang high-level delegation nga gin-imbitahan nga magtambong sa meeting amo ang Indo Pacific partners sang NATO nga amo ang Australia, Japan, New Zealand, kag Republic of Korea.
Base sa Ukrainian military intelligence, ginabanta nga 12,000 North Korean troops lakip na ang 500 ka mga opisyal kag tatlo ka mga heneral ang yara na subong sa Russia kag nagahanas sa lima ka military bases.
Wala ginpanginwala ni Russian President Vladimir Putin ang pagpadala sang North Korean troops sa Russia, apang ginsiling sini nga pagusto na ang Moscow kun paano iimplementar ang kasugtanan sini kaupod sa Pyongyang nga nagalakip sang mutual defense clause para nga mabuligan nila ang isa kag isa pananglitan may yara sang external aggression.
Matandaan nga ginlunsar sang Russia ang full-scale invasion sa Ukraine sang Pebrero 2022.
