Ginkakibot sang pila ka mga opisyal sang Pavia, Iloilo kag sang mga motorista ang pagpugok sang trapiko sa Ungka Flyover apisar nga ginduso sang Department of Public Works and Highways (DPWH) Region 6 ang traffic alignment sa flyover.
Sa interview sang Bombo Radyo kay Pavia Sangguniang Bayan Member Pyt Trimañez, iya ginpahayag nga liwat sila nga magapatuman sang pagsinapol kaupod ang Traffic Management Office kaangot man sa natabo nga pagpugok sang trapiko subong nga adlaw sa Ungka Flyover.
Suno kay Trimañez, ini agud nga mausisa kag matumod ang mga ‘factors’ nga mahimo nagtuga sang paghinay sang dalagan sang trapiko.
Ginpahayag man sini nga sa subong, ginasunod ang plan A sang trapiko kon sa diin, tingob ang mga salakyan nga nagapadulong sa terminal kag ang mga nagasaka sa flyover.
Isa naman sa ginalantaw pagid sang natungdan nga nagatuga sang huol sa dalagan sang trapiko sa flyover, amo ang mga public utilities vehicle nga naga-ula ukon naga-unload sang ila mga pasahero sa sulod sang vicinity sang duha ka mga mall malapit sa flyover.
Nagpanugyan man ang opisyal sa mga pedestrians nga nagatabok sa dalan malapit sa flyover nga magsunod sa mga pagsulundan agud nga indi na makatuga sang dugang nga paggutok sa trapiko.
