Ginpasigurado sang Tigbauan Municipal Police Station nga hilway sa kasablagan ukon safe ang pamilya kag himata sang ginluthang-patay nga anay punong barangay sang San Rafael, Tigbauan, Iloilo.
Ang biktima amo si Joevani Triste, residente sang nasambit nga lugar.
Samtang ang suspek amo si John Castro Jr.
Sa interview sang Bombo Radyo kay Police Captain Alfred Mansoy, Chief of Police sang Tigbauan Municipal Police Station, iya ginpahayag nga nagbutang na sila sang police personnel sa palibot sang nasambit nga barangay agud nga mapabilin ang safety sang mga pumuluyo.
Nagpanugyan man ang hepe sa punong barangay sang lugar nga indi magkahadlok kag tipunon ang tanan nga mga barangay tanod agud mas mapasangkad ang pwersa sang police visibility sa lugar.
Suno kay Mansoy, ginaubra sang talatapan ang tanan nila nga mahimo agud nga mapabilin ang kalinong kag katawhay sang amo nga barangay.
Nahibaluan nga napasakaan na sang kaso sang Tigbauan Police Station ang suspek kag sa subong, yara naka-kustodiya sa nasambit nga talatapan.
