Gin-athag sang hepe sang Tigbauan Municipal Police Station nga wala gindakop agud presuhon ang suspek sa pagpatay sa anay punong barangay sang San Rafael,Tigbauan, Iloilo bangud nga wala ini sang warrant of arrest.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station, iya ginpahayag nga apisar may na-file na nga kaso batok kay John Castro Jr. bangud sa pagpatay kay barangay kagawad Jobanie Triste, wala gindakop si Castro sang nagpadulong ini sa Iloilo City Police Office bangud nga nag-lapse na ang hot pursuit operation.
Suno kay Mansoy, bangud wala sang warrant, indi makabig nga pag-surrender ang ginhimo ni Castro bangud nagpalapit ini sa otoridad para man sa iya nga seguridad.
Una na ginpahayag sang abogado ni Castro nga nga indi na ini magpalagyo kag hulaton nalang ang warrant of arrest batok sa iya samtang yara ini sa kustodiya sang isa ka pribado nga indibidwal.
Dugang sang hepe, nag-ako man ang suspek paagi sa extrajudicial confession ang pagpatay kay Triste apang nanindugan nga “self defense” lamang ang iya ginhimo.
