Gingutom kag ginkapoy ang pila ka mga pasahero sa Tagbak Terminal sa Jaro bangud sa tuman ka lawig nga pila subong nga Pista Minatay.
Sa interview sang Bombo Radyo kay Cynthia Gajeto, manunudlo, iya ginpahayag nga una siya nga nagpadulong sa ceres terminal apang, tuman man ka puno kag malawig ang pila sang mga pasahero, rason nga nagkadto ini sa Tagbak Terminal agud makahingagaw sakay sa van.
Suno kay Gajeto, naghalin siya sa isla sang Guimaras kon sa diin siya nagaserbe bilang isa ka manunudlo kag magapauli kontani sa banwa sang Carles subong nga Pista Minatay.
Tuyo man sang natungdan nga magbisita sa iya amay sa patyo bangud man sa kadugay na sini nga wala nakadu-aw.
Ginpahayag man sini nga duha tubtob tatlo ka oras ang byahe antes makaabot sa ila puluy-an sa Carles.
Masobra duha naman ka oras ang ginhulat sini antes nga natigayon nga nakasakay sa van.
