Nagsaka na sa 207 ka mga banwa kag 29 ka mga syudad sa 14 ka mga probinsya ang nakadeklarar sang state of calamity bangud sa halit nga natuga sang magkasunod nga Bagyo Kristine kag Bagyo Leon.
Ang mga probinsya nga nakadeklarar sang amo nga status amo ang Albay, Batangas, Camarines Norte, Camarines Sur, Catanduanes, Cavite, Laguna,, Quezon, kag Sorsogon.
Paagi sa deklarasyon nga ini, mahimo magamit sang local government units ang calamity funds para nga ma-address ang kinahanglanon sang mga pumuluyo kag awtomatiko man nga ipatuman ang price freeze sa basic goods sa apektado nga mga lugar.
Ang Energy Regulatory Commission (ERC) ang nagmandu man sa distribution utilities nga indi lang anay magpatuman sang disconnection sang electricity services sa customers nga nagakonsumo sang 200 kilowatt hours ukon mas manubo pa sa areas nga napaidalom sa state of calamity.
Nagmandu man ang regulatory commission sang flexible payment options para sa electricity bills sa October, November, kag December.
Nahibaluan nga sa latest report sang National Disaster Risk Reduction and Management Council (NDRRMC), 150 na ang nagkalamatay bangud sa duha ka bagyo magluwas pa sa 29 nga na-report nga missing kag 115 nga na-report nga nasamaran.
Yara man sa 7.5-million ka mga tawo ukon 1.89-million ka mga pamilya ang naapektuhan nanday Kristine kag Leon sa 17 ka mga rehiyon kun sa diin kadam-an ang yara sa Bicol Region, Central Luzon, kag CALABARZON.#
(AFP/Charism Sayat)
